الهرم الرابع
الهرم الرابع
الهرم الرابع ... دايما بنسمع الجملة دي معتقدين إن أهرامات مصر 3 بس في إشارة واضحة لأهرامات الجيزة
لكن الحقيقة أهرامات مصر كتير جدا عددها بيزيد عند 138 هرم ..
طبعا دي الأهرامات المنفردة أو الأهرامات الرئيسية غير الأهرامات التابعة .
أما عن الهرم الرابع ...
- الهرم الرابع تاريخيا حيكون واحد من أهرامات الأسرة الثالثة وهي أول أسرة تبنت فكرة تطوير عمارة المقابر من مصاطب لأهرامات.
أول هرم هو هرم زوسر المدرج بسقارة وتاني هرم هو هرم سخم خت في سقارة، أما عن تالت ورابع هرم فبينتموا للملكين خع با ونب كاو، الهرمين كانوا في زاوية العريان لكنهم اتهدموا ومالهمش أي أثر.
يعني الهرم الرابع تاريخيا هو هرم من أهرامات الأسرة التالتة وهو هرم الملك نب كاو في زاوية العريان ومالوش أثر حاليا.
- الهرم الرابع في منطقة الجيزة
لو بنتكلم عن مجمع هرم يعني الهرم الرئيسي في المجموعة الهرمية فالهرم الرابع هنا حيكون هرم الملكة خنت كاوس ابنة الملك من كاورع.
أما لو المقصود أي هرم سواء هرم رئيسي أو تابع فالهرم الرابع حيكون واحد من ال 3 أهرامات التابعة لمجموعة الملك خوفو .. غالبا حيكون الهرم الأوسط من ال 3 أهرامات لأن المجموعة الهرمية للملك خوفو بالإضافة للهرم الرئيسي الخاص بالملك يوجد 4 أهرامات هي هرم العبادة توجد بقاياه في جنوب شرق هرم خوفو .. و3 أهرامات خاصة بالملكات (حتب حرس، ميريت إت إس، حنوت سن) وبكده حيكون الهرم الرابع هو هرم الملكة ميريت إت إس.
- الهرم الرابع من حيث الارتفاع
لو من حيث الارتفاع والضخامة الهرم الرابع حيكون هرم سنفرو المنحني في دهشور المعروف باسم الهرم المنحني أو الهرم المائل وهو أحد أهرامات الأسرة الرابعة.
ويسبقه في الارتفاع هرمي خوفو وخفرع في الجيزة والهرم الأحمر في دهشور.
فياريت لما حد يفكر يقول جملة "الهرم الرابع" يبقى يحدد بالظبط بيتكلم على أنهي هرم ..
تعليقات
إرسال تعليق