إنسان

أنا إنسان ..
حيران قلقان
جوايا كلام
دايما خجلان

إنسان بهتان ..
من غير ألوان
عايش وخلاص  .. نفسى ف إخلاص
أحزانى كتير  .. ووجعى كبير
بس التفكير  زى السجان

جوايا كلام
محبوس بكسوف
للبوح ملهوف
متردد عايز أنطق
ولسانى جبان

باشتكى م الدنيا وم الظروف
إنسان ضايع ومش مألوف
طريقى مفروش بالخوف
وقلبى دايما قلقان

إنسان شفاف ..
ومش متشاف
مذلول متهان
ياما عاش وشاف

إنسان موجوع ..
غرقان فى دموع
صرختى محبوسة
صوتى مش مسموع

إنسان ضعيف
فى دنيا قوية
وكل مافيها بييجى عليا
مش فاضل منى أى بقية ...
واللى فاضل منى بقايا إنسان
وفى الأخر أنا إنسان ..