اعمل ضريبة ...
اعمل ضريبة
اعمل ضريبة ع الهدوم .. واعمل
ضريبة ع الهموم
اعمل ضريبة لكل يوم
اعمل ضريبة ع اللى غنى ورقص ومال
اعمل ضريبة ع اللى خلع واللى شال
واعمل ضريبة ع اللى بخته مال ..
اعمل ضريبة ع اليمين وع الشمال
اعمل ضريبة ع اللى قال و ع اللى
فكر يوم يقول
اعمل ضريبة ع اللى عدى وفات
واعمل ضريبة ع اللى مات
اعمل ضريبة ع اللى ماشى وقوله هات
اعمل ضريبة ع الإنجازات ..
اعمل ضريبة ع التضحيات
اعمل ضريبة ع الكلمات و ع السكات
واعمل ضريبة ع الحوادث والأزمات
واعمل ضريبة ع الأهات
اعمل ضريبة ع الصور والذكريات
اعمل ضريبة ع الفتن و ع النزاعات
واعمل ضريبة ع الأفلام والمسلسلات
وكمان اعمل ضريبة على مشاهدة الإعلانات
اعمل ضريبة ع الوجع و ع الألم ودموع العين ..
اعمل ضريبة ع الفراق و ع الحنين
لأ ده انت تعمل ضريبة ع الأنين ..
و ع القلق والقلقانين
واعمل ضريبة ع اللى بيسألوا
وبيفكروا واللى دايما حيرانين
اعمل ضريبة ع السمع والودان
اعمل ضريبة ع السكن وع الجيران
امنع الصلاة واعمل ضريبة على الأذان
اعمل ضريبة ع الإيمان
واعمل ضريبة ع الإستقرار و ع الأمان
اعمل ضريبة ع الأغانى .. واعمل ضريبة ع التهانى
واعمل ضريبة ع الأحلام وع الأمانى ..
اعمل ضريبة كل يوم والتانى
اعمل ضريبة ع العقول واعمل ضريبة ع العجول لأ بقى ... ده انت تعمل ضريبة كمان ع الفول
اعمل ضريبة ع اللى عدى وراح
واعمل ضريبة ع البراح
واعمل ضريبة ع الجراح
خلى الضريبة سداح مداح
اعمل ضريبة ع اللى واقف واللى راكب واللى ماشى
واعمل ضريبة ع اللى وافق فى يوم وقالك ماشى
وبالمرة اعمل ضريبة ع المواشى
اعمل ضريبة ع البعبعة والفضفضة والجعجعة والبوح
اعمل ضريبة على البكى والنوح
اعمل ضريبة ع النفس وعلى طلوع الروح
اعمل ضريبة على اللى صلى العصر
واعمل ضريبة ع اللى هتف باسم مصر
واعمل ضريبة ع اللى قضى حياته قهر
وياريت تعمل ضريبة كمان ع الفقر
اعمل ضريبة ع الخنقة والزحمة وضيقة الحال اعمل ضريبة ع النكد وع الخناق والنفاق والملل والانحلال
ولو فى مرة شدينا حيلنا وحسيتنا شوية مبسوطين
نيلنا بنيلة وخلى حياتنا طين
واعمل ضريبة ع المصاصات والطراطير والبلالين ..
اعمل ضريبة ع السعادة والإنبساط
واعمل ضريبة ع الإنحطاط
اعمل ضريبة ع الكلام .. واعمل ضريبة ع السلام
اعمل ضريبة ع الإحترام .. واعمل ضريبة ع الخصام
اعمل ضريبة ع العتاب وع الملام
اعمل ضريبة على أى حاجة وعلى أى كلام ..
اعمل ضريبة والسلام
تعليقات
إرسال تعليق