ردود في غير محلها

لما اتكلم مع حد لازم الرد يكون مناسب للكلام، مش يكون ردود في غير محلها.... 

لما أقولك صباح الخير أو مساء الخير رد عليا بالرد المناسب للتحية..

مش تقولي وعليكم السلام

أنا ما قولتش السلام عليكم

أنا ما رمتش السلام علشان ترد السلام!!!!

ولازم تفهموا كويس إن الجملة دي ما بقتش مرتبطة بالتحية والسلام لا دي بقت مرتبطة بفئات معينة مش كلنا ننتمي ليها وكمان مرتبطة بالرجالة والقهاوي..

ولما أكون معدية من قدام أي حد مش لازم اسمع نفس الجملة وعليكم السلام

أنا ما سلمتش أصلا، ومش مفروض إني أسلم، انتوا بقى بتسلموا على مين 🤔🤔

ومش مسموح برضه انك تقولي السلام لله!! 

ده كده جر شكل يدخل في نطاق التحرش، اه تخيل بقى دي جملة تحرش. 

ولما أقولك شكرا.. قول العفو

مش جزانا وإياكم!!!

هو أنا كنت بقول ايه علشان يبقى ده ردك؟!!

هو أنا جبت سيرة الجزاء علشان تقولي جزانا وإياكم.

ولا تقول لي الشكر لله

ده المقولة بتقول لا شكر لمن لا يشكر الناس، يعني عادي نشكر الناس على أي فعل، وعادي أقولك شكرا.. يبقى ترد رد طبيعي

ما تحاولش تعلي على الناس بالإيمان، لإن الإيمان مش بالكلام..

ومن الإيمان الكلمة الطيبة، الكلمة الطيبة صدقة..

أما الردود العجيبة اللي بتمثلوا بيها وتنافقوا وتحاولوا تثبتوا بيها انكوا متدينين لا ده تنمر واساءة وسخرية.

الردود العجيبة دي مش مقبولة.

وإن حييتم بتحية فحيوا بأحسن منها

لا يسخر قوم من قوم

الكلمة الطيبة صدقة

⬅️ ليكوا طبعا كامل الحرية في اختيار كلامكوا وطريقة كلامكوا لكن من غير إساءة..

وممكن تلموا بعض وتفضلوا تتكلموا بالطريقة بتاعتكوا براحتكوا لكن ما ينفعش تفرضوها على غيركوا بالإكراه..

وطريقتكوا المنفرة في الرد بتخلينا ما نتعاملش معاكوا أصلا.

فوفروا الهري لمناسبات تانية..